Reflexión trala SEGUNDA sesión cas FAMILIAS sobre comunicadores dinámicos (SOFTWARE)

 

    Hoxe tivo lugar a segunda sesión coas familias sobre comunicadores dinámicos; nesta ocasión centrámonos no software. Como sempre, despois das sesións, repaso mentalmente as conversas e as inquedanzas das familias.

Esta vez estiven a darlle voltas a unha pregunta que se repetiu un par de veces:

“Podemos cambiar de paquete de cadrículas?”

A miña resposta foi que, se o paquete é robusto, está ben estruturado, o neno xa leva tempo usándoo e aprendeu a planificación motora, non é conveniente cambialo, xa que require moito esforzo e tempo aprender a localización e o vocabulario que contén.

Esta pregunta xurdiu de familias que xa tiñan un comunicador cun paquete de comunicación robusto, pero comentárono tras ver outros paquetes e salientar un deles por ser o máis recente, ou por incluír algunhas funcións que consideraron melloras.

Pensando niso, gustaríame puntualizar que eu comentei as diferenzas e posibilidades dos paquetes para que:

1. As familias puidesen identificar o paquete que usan os seus fillos/as.

2. As persoas que están no proceso de escolla visen que hai diferenzas entre uns e outros: por exemplo, se o vocabulario núcleo  permanece en pantalla ao acceder ao periférico ou non, o tipo de organización (sintáctica, pragmática, combinada...), ou como se fan as conxugacións, entre outras.

Pero non deben preocuparse se teñen un paquete robusto e hoxe viron outro que lles gustou máis. Non quero que marchen coa sensación de que o que teñen non é suficiente, porque, como dixen ao comezo da presentación, o máis importante é que o paquete estea adaptado ás características e necesidades do seu fillo/a e QUE SE USE (e tamén a metodoloxía, por suposto).

O resto —funcións, botóns, deseños— pódese engadir, copiar ou adaptar. Non deberiamos preocuparnos por detalles menores.

Non perdamos o foco: o paquete ten que ser ROBUSTO...

 

O demais é ir axustando o gridset ao usuario, segundo as súas necesidades e personalidade.

É como nas dietas para adelgazar: sabemos o que hai que facer —comer saudable, evitar comida "basura" e facer exercicio—. Non pensemos que, por non comer sementes de chía ou liño, o estamos facendo mal. A busca da perfección pode ser estresante e unha perda de enerxía. Fagámolo doado: se temos un paquete robusto, agora toca axustalo para que o neno ou nena se identifique con el e o use.

En definitiva:

O mellor software e o mellor paquete de comunicación é o que está axustado ao usuario e o que se usa. Ten  que parecerse ao neno, soar como el, e amosar a súa personalidade e estilo comunicativo xa que: é a súa voz! 

Moita sorte no camiño, FAMILIAS!

Deica outra!